Julenøtter (2)

Dagens scenario: Du arbeider ved eit byarkiv, der du har ansvar for privatarkiva. Ein dag ringer enka til ein tidlegare ordførar; la oss kalle han Hartmann (sidan siste episode av Forbrytelsen går på TV denne veka). Hartmann, som døydde for eit par år sidan, var ein viktig næringslivsaktør i byen. Han var også statsråd ei periode. Enka spør om byarkivet kan vere interessert i papira etter ektemannen. Ho fortel at ho ikkje har rørt dei etter at mannen døydde. Som den gode arkivar du er, avtalar du eit besøk neste dag for å sjå på papira.

Neste dag brukar du til å gå igjennom Hartmanns arkiv. Du finn fort ut at det inneheld eit omfattande og interessant materiale om politikk og næringsliv, både på lokalt og nasjonalt nivå. Og du legg merke til at delar av arkivet er viktig kommunalt og statleg arkivmateriale, som Hartmann må ha tatt med heim mens han var ordførar og statsråd. Etter nokre timar oppdagar du dokument som kan tyde på at Hartmann har vore innblanda i tvilsame forretningar og korrupsjon. Du finn også brev som viser at Hartmann hadde ei rekkje utanomekteskapelege forhold.

Etter at du har gått igjennom arkivet, inviterer enka deg på kaffi for å diskutere kva som skal skje med arkivet. Kva gjer du?

a) Fortel du henne at arkivet inneheld dokument som tyder på økonomisk og privat utruskap?
b) Held du kjeft om dette, men seier at arkivet er viktig og spennande og at byarkivet gjerne vil ta i mot det?
c) Informerer du politiet om at du har funne dokumentasjon av muleg økonomisk kriminalitet?
d) Tar du kontakt med Riksarkivet og fortel at du har funne viktige regjeringsdokument i Hartmanns arkiv?
e) Eller gjer du noko anna?